យោងតាមការចុះផ្សាយរបស់ ក្រសួងទេសចរណ៍ នៅថ្ងៃទី១០ ខែកញ្ញា ឆ្នាំ២០២២ បានចេញសេចក្ដីជូនដំណឹងដល់សាធារណជនទាំងអស់ឱ្យបានជ្រាបថា ក្នុងគោលបំណងរក្សាបានប្រពៃណី ទំនៀមទម្លាប់របស់ដូនតា ក៏ដូចជាបង្កបរិយាកាសរីករាយជូនបងប្អូនប្រជាពលរដ្ឋក្នុងខេត្តឧត្តរមានជ័យ ជារៀងរាល់ឆ្នាំ (លើកលែងតែក្នុងអំឡុងពេលឆ្នាំនៃការឆ្លងរាលដាលនៃជំងឺកូវីដ-១៩)។
អាជ្ញាធរខេត្តតែងរៀបចំពិធីប្រណាំងទូកនៅបឹងស្នោរ បរិវេណសួនច្បារផ្លូវភ្លោះមុខសាលាខេត្ត ហើយក្នុងឆ្នាំនេះ នាថ្ងៃទី០១-០២ ខែតុលាខាងមុខ រដ្ឋបាលខេត្ត ក៏នឹងបន្តរៀបចំកម្មវិធីមហោឡារិក នេះដូចជាបណ្ដាឆ្នាំមុនៗដែរ ដោយចាត់តាំងឱ្យមានការប្រណាំងទូក “ង” ខ្នាតអន្តរជាតិ ជាលក្ខណៈមិត្តភាពរបស់បណ្ដាស្ថាប័ន មន្ទីរ-អង្គភាពជុំវិញខេត្ត និងទូករបស់បណ្ដាខេត្តជាប់ ព្រមទាំងការដាក់តាំងបង្ហាញ និងលក់ផលិតផល-កសិផលក្នុង និងក្រៅស្រុក គ្រឿងឧបភោគសព្វសារពើ ក្នុងគោលបំណងបង្ហាញអំពីសក្កានុពលរបស់ខេត្តនាពេលបច្ចុប្បន្ន រួមនឹងមានការប្រគុំតន្ត្រី និងល្បែងកំសាន្តនានាក្នុងពេលរាត្រីផងដែរ។
អាស្រ័យដូចបានជម្រាបជូនខាងលើ សាធារណជនទាំងអស់មេត្តាជ្រាប និងចូលរួមក្នុងពិធីនេះឱ្យបានអធឹកអធម ដើម្បីញុាំឱ្យមានការប្រារព្ធពិធីនេះ មានភាពឱឡារិក និងប្រកបដោយបរិយាកាសសប្បាយរីករាយ ៕ ប្រភព៖ Khmernote
