ថ្ងៃ Valentine ឬ ថ្ងៃនៃបុណ្យនៃសេចក្ដីស្រឡាញ់ គឺជាពេលវេលាពិសេសមួយសម្រាប់មហាជនគ្រប់រូប ក្នុងការបង្ហាញពីក្ដីស្រឡាញ់របស់ពួកគេជូនចំពោះមនុស្សជាទីស្រឡាញ់ មិនថាសង្សារ មិត្តភក្តិ ឬ ក្រុមគ្រួសារនោះឡើយ។ ជាធម្មតា ការបង្ហាញពីក្ដីស្រឡាញ់ក្នុងថ្ងៃពិសេសមួយនេះ មហាជនទូទៅតែងទិញជាកាដូ ឬ ការណាត់ជួបញ៉ាំអាហារនៅខាងក្រៅជាដើម។ យ៉ាងណាមិញ ចំពោះបុរសវ័យកណ្ដាលម្នាក់នៅប្រទេសថៃ បែរជាបង្ហាញក្ដីស្រឡាញ់ដ៏ធំធេងរបស់លោកចំពោះគូស្នេហ៍ ក្នុងទង្វើដ៏គួរឱ្យស្ញប់ស្ញែងបំផុតមួយ។
បុរសសញ្ជាតិថៃវ័យ ៥២ ឆ្នាំ ម្នាក់ឈ្មោះ Suthep “Maew” Lomjit កាលពីថ្ងៃទី ១៤ ខែកុម្ភៈ ឆ្នាំ ២០២៣ កន្លងទៅ បានសម្រេចគោលដៅដើរចម្ងាយ ១២ ០០ គីឡូម៉ែត្រ ដើម្បីសុំមិត្តស្រីរបស់លោករៀបការ។ តាមការចេញផ្សាយរបស់សារព័ត៌មាន The Nation Thailand បានឱ្យដឹងថា លោក Suthep បានចាប់ផ្ដើមការដើររបស់លោកនៅថ្ងៃទី ១៤ ខែមករា ឆ្នាំ ២០២៣ ចេញពីខេត្ត Nakhon Nayok ទៅកាន់ខេត្ត Satun ជាមួយនឹងគោលបំណងធំទៅដល់ផ្ទះមិត្តស្រីរបស់លោកក្នុងថ្ងៃ ១៤ កុម្ភៈ។
តាមសម្ដីរបស់បុរសខាងលើបាននិយាយថា៖ «ខ្ញុំចង់ឱ្យអ្នកដែលមើលងាយក្រុមគ្រួសារ និង មនុស្សជាទីស្រឡាញ់របស់គេ ក៏ដូចជាអ្នកដែលមិនស្មោះត្រង់នឹងប្រពន្ធ គួរតែចាប់អារម្មណ៍លើដំណើរតស៊ូមួយនេះ»។ លោកបានបន្ថែមឱ្យដឹងទៀតថា លោកបានស្រកអស់ ១៧ គីឡូ ក្នុងការដើរឆ្លងកាត់ខេត្ត ប៉ុន្តែលោកនៅតែរីករាយខ្លាំង ដែលមានឱកាសបង្ហាញក្ដីស្រឡាញ់ចំពោះភរិយារបស់លោក។
គួរឱ្យដឹងថា លោក Suthep និង គូស្នេហ៍ គឺស្ថិតក្នុងវ័យ ៥០ ឆ្នាំដូចគ្នា ដោយពួកគេលង់ស្រឡាញ់គ្នាតាម TikTok កាលពី ៥ ឆ្នាំមុន ហើយពួកគេបានជួបមុខគ្នាដំបូងនៅថ្ងៃទី ១៤ កុម្ភៈ កន្លងទៅនេះ ហើយក៏ចុះសំបុត្រអាពាហ៍ពិពាហ៍ជាមួយគ្នាក្នុងថ្ងៃតែមួយនោះដែរ៕
