បុរសម្នាក់ បានធ្វើឱ្យអ្នកលេងបណ្ដាញសង្គមហ្វេសប៊ុកជាច្រើននាំគ្នាភ័យស្លន់ស្លោ ក្រោយរូបលោកធ្វើការបង្ហោះរូបភាពមួយចំនួននៃវត្ថុម្យ៉ាងរូបរាងគួរឱ្យខ្លាចវារចេញពីផ្ទៃសមុទ្រមកលើឆ្នេរ។
បុរសម្នាក់ឈ្មោះ Jan Vorster បានចែករំលែករូបភាពមួយចំនួននៃវត្ថុគួរឱ្យខ្លាចម្យ៉ាង ដែលលោកថតចេញពីឆ្នេរសមុទ្រនៃស្រុកកំណើតរបស់លោកនៅ Still Bay ខេត្ត Western Cape ប្រទេសអាហ្វ្រិកខាងត្បូង។ រូបភាពដ៏គួរឱ្យខ្លាចនោះដែរ ត្រូវបានអ្នកលេងតាមបណ្ដាញសង្គមនាំគ្នាផ្ទុះការវែកញែកព្រោងព្រាត ដោយមួយចំនួនក៏បញ្ចេញមតិយល់ច្រឡំថានោះគឺជាសត្វចម្លែក ឬ ពពួកសត្វក្រៅភពទៀតផង។
យ៉ាងណាមិញ បើតាមការបញ្ជាក់របស់បុរសជាអ្នកបង្ហោះរូបភាពទាំងនោះ បានទម្លាយឱ្យដឹងថា លោកមិននឹកស្មានថា រូបភាពដែលលោកបង្ហោះក្នុងបំណងលើកកម្ពស់ពីការយល់ដឹងអំពីការខូចខាតដល់បរិស្ថាននេះ អាចធ្វើឱ្យមហាជននាំគ្នាយល់ច្រឡំ និង ភ័យខ្លាចថាជាសត្វចម្លែកទាល់តែសោះ។ តាមពិតទៅ រូបភាពដែលលោកថតទាំងនោះ គឺគ្រាន់តែជាដើមប្រទាលកន្ទុយក្រពើដែលវាស្ងួតក្រៀមតែប៉ុណ្ណោះ៕ ប្រភព៖ ប្រជាប្រិយ
